ЧР Шалти ĕçсен министерствин Шăмăршăри уйрăмĕн ветеранĕсем вырăнти полици уйрăмĕн ĕçченĕсемпе тачă çыхăну тытаççĕ. Халерех акă ертỹлĕх чĕннипе, çак йĕркесен авторĕ _ Шалти ĕçсен органĕсен ветеранĕсен Канашĕн председателĕ Егор Сетриванов тата ятарлă çар операцийĕн участникĕ, милици майорĕ, рота командирĕ, Раççей Хĕç-пăшаллă Çарĕсен аслă лейтенанчĕ Николай Гордеев вĕсемпе тĕл пулчĕç.

Николай Петрович СВОри лару-тăрупа паллаштарчĕ. Вăл тăшман çав тери хăрушă та чее пулнине, НАТО тăратакан çĕнĕ йышши хĕç-пăшалпа çапăçнине, апла пулин те Раççей салтакĕсем фронтра паттăррăн çапăçнине палăртрĕ.

_ Çĕнтерỹ пирĕн енче пулать! _ çирĕппĕн каларĕ командир.

ОВД ветеранĕсем, Шăмăршăри полици уйрăмĕн начальникĕ Наиль Тепитов хушнипе, кунти ĕçченсене кĕçĕн лейтенант пакунĕсем пачĕç. Çак чыса тивĕçнисем _ анализ, планировани, контроль инспекторĕ Любовь Макарова тата дежурнăй чаçри оперативлă дежурнăй Данил Севрюгин.

Ветерансем çамрăк ăрăва хăйсен ĕçне малалла тивĕçлипе тăсмашкăн пил панипе пĕрлех ырлăх-сывлăх, пысăк ăнăçу сунчĕç.

Егор Сетриванов, Шалти ĕçсен органĕсен ветеранĕсен Канашĕн председателĕ.

Редакцирен. Йĕрке хуралçисене тата Шалти ĕçсен органĕсен ветеранĕсене округ çыннисен ятĕнчен пĕтĕм чун-чĕререн професси уявĕпе саламлатпăр. Çăмăл мар ĕçе халăха юрăхлă туса пыма хурçă пек сывлăхпа иксĕлми вăй-хăват, çирĕп чун хавалĕ сунатпăр.

Сирĕн шанчăклă хỹтлĕхĕрте тăнишĕн савăнатпăр, Сирĕнпе мăнаçланатпăр!