Кăçалхи апрелĕн 1-мĕшĕнче ирпе 8.00 сехетрен пуçласа пĕтĕмĕшле пĕлỹ паракан вĕренỹ учрежденийĕсен 1-класне кайма заявлени йышăнма пуçлаççĕ. Заявленисене 2 тапхăрпа _ ача хăш вырăнта пурăннине кура _ июнĕн 30-мĕшĕччен йышăнаççĕ. Июлĕн 6-мĕшĕнчен пуçласа сентябрĕн 5-мĕшĕччен _ хăш вырăнта пурăннине пăхмасăр _ йышăнма палăртнă.

Заявление виçĕ майпа пама пулать: ача ашшĕ-амăшĕ (законлă представителĕ) шкула пырса çырнипе (хăйсен харпăрлăхне кăтартакан документа _ паспорта _ кăтартмалла), ăна заказлă çырупа почта урлă çитерсе, Патшалăх çăмăллăхĕсен порталĕ урлă «Ачана шкула кайма çырăнтарасси» («Запись ребенка в школу») раздела кĕрсе çырăннипе.

1-класа вĕренме кĕмешкĕн çак документсем кирлĕ:

- ача ашшĕ-амăшĕн (законлă представителĕн) хăйсен харпăрлăхне кăтартакан документ _ паспорт;

- ача çуралнине çирĕплетекен свидетельство (заявлени çыраканăн тăванлăха çирĕплетекен докуменчĕ);

- опекăна е попечительствăна ĕнентерекен документ;

- ача хăш вырăнта пурăннине (куçса килнине) çирĕплетекен документ е хăш вырăнта пурăннине регистрациленине кăтартакан справка;

- черетсĕр кĕме е пирвайхи йышăнăва тивĕçлĕ ачан ашшĕ-амăшĕн (законлă представителĕн) ĕçĕнчен панă справка;

- ача ашшĕ-амăшĕ (законлă представителĕн) ют çĕр-шыв гражданĕсем е гражданлăхсăр пулсан, заявлени параканăн (законлă представителĕн) Раççей Федерацийĕнче пулнине (пребывание) çирĕплетекен документ пулмалла;

ку тĕслĕхре пĕтĕм документа вырăс чĕлхипе çырмалла (вырăсла куçармалла).

Заявлени копийĕсем вĕренỹ учрежденийĕнче ача кунта пĕлỹпе воспитани илнĕ тапхăр тăршшĕпе упранаççĕ.

Н.Ендиеров, округ администрацийĕн вĕренỹпе çамрăксен политики пайĕн начальникĕ.