Чăваш чĕлхи – анне чĕлхи

Эп _ чăваш чĕлхипе мухтанатăп...

Питĕ çепĕç, янравлă чĕлхе!

Пĕтĕм çын умĕнче эп калатăп:

_ Ун пекки _ тĕнчере вăл пĕрре!

Анне панă чĕлхе вăл _ асамлă,

Чуна çывăх, чи хаклă чĕлхе.

Пултăрах яланах вăл сăваплă.

Манас марччĕ ăна ĕмĕрне!

Чăваш чĕлхи – чĕкеç чĕлхи

Чăваш чĕлхи – чĕкеç чĕлхи.

Чĕвĕлтетсе чиперленет.

Чăннипеле, чи чеченни.

Чăнах, чăваш чечекленет.

Чăваш чылай чĕлхесенчен

Чухлавлăрах, чипертерех.

Чеченсемпе черкессенчен

Чăтăмлăрах, черченкĕрех.

Чăваш чĕри – чăн-чăн чĕре!

Чунпа чухлать, чыссăрланмасть.

Чипер чăвашăн чĕнтĕрне

Чăрсăрланса чухăнлатмасть.

Чăваш, чăнах, чĕркуçленмест,

Чĕмсĕрленсе чунсăрланмасть.

Чееленсе чĕтĕремест,

Чăхăмласа чураланмасть.

Чăваш чĕлхи _ чĕресене,

Чуна чĕртсе чиперлетет.

Чĕкеçленсе, чĕвĕлтетсе,

Чăваш, чыслар чăвашсене!

Чăваш чĕлхи – чăн-чăн ахах

Атте, анне, пичче...

Епле çемçе чĕлхе

Мана парнелесе

Ỹстернĕ Çĕр çинче.

Чăваш вăл ĕлĕкрен

Пулайнă пит патвар,

Вутра çунман, ĕнен,

Пулман вăл янавар.

Чăваш чĕлхи пуян

Пин-пин сăмах пуртан.

Çулсем иртсе кайса

Пĕрре те мăкалман.

Чăваш чĕлхи кĕвви

Тĕнче уçлăхĕнче

Вут кайăкла вĕçсе

Саланнă тĕнчене.

Маттур вăл _ Андриян

Тăван чĕлхе хĕмне

Таçта çити сапса

Çĕклерĕ çỹлелле...

Пин-пин юмах та пур,

Сăвви-юрри пайтах.

Чăваш çав пит маттур,

Чĕлхи _ чăн-чăнах ахах!

Надежда Чечекпи, Виçпỹрт Шăмăршă ялĕ.

Чăваш пулнишĕн мухтанатăп

Чăваш пулнишĕн мухтанатăп,

Чăваш пулнишĕн хурланмастăп.

Чăваш çынни _ чи хастарри,

Чăваш çынни _ малти ретри!

Чăваш ятне çỹлте тытатăп.

Хам тỹпене шавах хыватăп

Ыр ĕç-пуçа та пулăма,

Савса тăван халăхăма.

Чăваш пулса шавах пурнасчĕ,

Чăвашлăха шавах упрасчĕ.

Асаттесен ыр хавалне

Парасчĕ хам мăнуксене.

Мария Левендеева, Шăмăршă ялĕ.