Таврăнăр киле
Тăнăçлăх та ырăлăх пултăрччĕ тесе,
Кайрĕ тухса халăх ак вăрçă хирне.
Ашшĕ-амăшĕ, кỹрши ячĕç пиллесе,
Чун юратнă арăмĕ юлчĕ шеллесе...
Сак тулли ачи-пăчи кĕтĕç ашшĕне,
Кашни кун хавхалантарĕç чĕвĕл сассипе.
Çиçĕм çиçĕ, аслати те кĕрлĕ хăш чухне,
Тĕттĕм каç та çуталайĕ вут-хĕм çутипе.
Турă систĕр, Турă илттĕр амăш кĕллине,
Сыхласа тăма пултартăр çамрăк чунсене.
Вăл илтесшĕн мăнуксен савăк куллине, _
Турă парнелетĕрччĕ чăн телей çулне.
Хыт кĕтетпĕр, тархаслатпăр:
_ Таврăнăр киле,
Аттесем те, мăшăрсем те хаклă ывăлсем!
Пурте чăтăмсăр кĕтетпĕр Çĕнтерỹ кунне...
Пулччăр такăр та тумхахсăр сирĕн çулăрсем!
Надежда Чечекпи, Виçпỹрт Шăмăршă ялĕ.