Алкоголизм хăрушă чир иккенне кашниех пĕлет, апла пулин те эрех-сăра патне çав-çавах аллине тăсать. Эрех- сăра сиенĕ калама çук пысăккине тепĕр хут аса илтерес килет.

Ун пирки çак фактсем çирĕплетеççĕ: алкоголь сусăрлăх тата вилĕм патне илсе çитерет; вăл çын психикине япăх витĕм кỹрет; эрех-сăрапа туслă çын ерекен чир-чĕре - сăмахран, туберкулеза, ВИЧ-инфекцие, СПИДа - «çаклатма» пултарать; пĕр стакан типĕ эрех те пуç мими ĕçне 12-15 кунлăха хавшатать; алкоголизм çынна хăй çине алă хурасси патне илсе çитерме пултарать; тăтăшах эрех-ханша ĕçекен вăхăтсăр ватăлать, ун ĕмĕрĕ 12-20 çул таран кĕскелет; алкоголь ар туртăмне чакарать; алкоголизм çулĕ çине тăнă хĕрарăмăн çие юлмасса та пултарать; алкоголь ĕçмисенче (напитки) этил спирчĕ пурри нумай чухне нерв системин параличĕ патне илсе çитерет; нумай ĕçекенĕн хусканăвĕ (координация движения) пăсăлать; алкоголь, наркотик пекех, нумай ĕçекен çынна унсăр тăрайми тăвать (зависимость); мухмăрлă çыннăн алкоголь психозĕ (белая горячка) пуçланма пултарать; çынна вĕлересси ытларах ỹсĕрле пулать; хĕрарăмсем арçынсенчен 4 хут хăвăртрах ĕçме вĕренеççĕ, çавăн пек çемьесенче ачасем 5 хут вăйлăрах йывăрлăха кĕрсе ỹкеççĕ; алкоголизм ачана ашшĕ- амăшĕнчен куçать; çак чир халăха пĕтерет; алкоголь серепине ытларах çамрăксем лекеççĕ; алкоголь ачан характерне начар витĕм кỹрет; алкогольпе наркăмăшланни - вăхăтсăр вилĕм сăлтавĕ; алкоголь хĕрарăма вăхăтсăр ватăлтарать, пулас ачан сывлăхне (пурнăçне) пысăк сиен кỹрет, апат ирĕлтерекен органсене сиенлет, пĕвер циррозĕ патне илсе çитерет, чĕрепе юн тымарĕсен системине аркатать, пỹрен йывăр чирĕсене аталанма «пулăшать», пуç мимин юн çаврăнăшне юрăхсăра кăларать, спермăсем çине начар витĕм кỹрет; алкоголь çемьене аркатать тата социаллă статуссăр хăварать; ăна пула хĕрарăм килти чурана çаврăнать; хĕрĕ умĕнче алкоголик ашшĕн идеалĕ пĕтет.

Ĕçмелле е çук - кашнин хăйĕн суйлавĕ, анчах та алла сăра-эрех кĕленчи тытиччен шутламалла: хамăр сывлăха пĕтернисĕр пуçне çывăх çынсен пурнăçне хăрушлăх умне кăларса тăратмастпăр-ши?

Н.Поликарпов,

Шăмăршă район больницин врач-наркологĕ.