«ХĔЛ хырăмĕ пысăк», - теççĕ халăхра. Çак каларăша эп кăçал, чăннипех, ăнланса илтĕм. Мĕн чухлĕ тырă-пулă, çитменнине тата витамин хатĕрленĕччĕ сысна самăртма! Хĕл хута лар пушанчĕ.

- Срочнă сыснана чикмелле, унсăрăн хамăра çăтса ярĕ тата, - терĕм мăшăрăма.

Тĕрĕссипе, виçĕ чух-чухран иккĕшне (5 пăт пурччĕ вĕсем) какая янăччĕ-ха, уйăх каялла. Хулари тăвансене кучченеçлĕх патăмăр пĕрне. Теприне Шăмăршă пасарĕнче сутса ятăмăр. Виççĕмĕшĕ пĕччен кичемленсе ывăнчĕ пуль. Арăмпа калаçса татăлтăмăр: вырсарникун юлашки сыснана пусса тирпейлемелле. Хам эп ку енĕпе специалист. «Ăш-чикне лайăх кăларса тирпейлетĕн», - тесе ялĕпех мана выльăх пусма йыхравлаççĕ. Пулăшакан пĕр çын çитет. Шăматкун 7-ри хĕрĕме хресна ашшĕне чĕнме ятăмăр. Кум, правурскер, çутăлнă-çутăлманах персе çитрĕ.

- Эсир мана чăнласах чĕнтĕр-и? Сысна пусмалла терĕ те крестненька... - сывлăш çавăрайми калаçрĕ хăй.

- Пысăк ĕç хускатнă чух кам шỹтлет? - касса татрăм эпĕ.

- Паян улталамалли кун. Апрелĕн 1-мĕшĕ. Мана арăм шăн пăр çине лартма ĕлкĕрчĕ те ĕнтĕ.

- Мĕнле?

- Уяв ячĕпе 50 грамм ыйтрăм та - ханша çук тет. Вăл шкап хыçĕнчех ларнă.

- Ĕçрĕн-и вара?

- Ăçта унта? Çук! Ман тоже гордость пур.

Ваттисен йăлипе пĕрер чĕркке янклаттартăмăр та ĕçе пикентĕмĕр.

Чух-чуха витерен сĕтĕрсе тухрăмăр. Туххăмрах çапса ỹкертĕмĕр. Хамăр та вăйлă: «Упа-ши элле?» - тесе шỹтлетпĕр.

Пĕррех чĕри тĕлĕнчен çивĕч çĕçĕпе пашлаттартăм. Асар-писер çухăраканскер, шăп пулчĕ. Чĕр чуна шеллетĕп, çавăнпа ăна асапран çийĕнчех хăтаратăп.

Иккĕнех сыснана каштаран çакса хутăмăр. Примуспа ĕнтме пуçларăмăр. Ăш-чикне кăларатпăр ак.

Ман Сăпанийĕм чупкаласа çеç çỹрет. Мунчаран вĕри шыв йăтса тăрать, савăт-сапа хатĕрлет. «Хаваслă тумламне» те ярсах тăрать. Хавхалану кирлех!

- Ỹпке-пĕверне парăр-ха кунта, суханпа ăшаласа хурам. Яшкана яма çакна парăр, - вĕткеленет пăрчăканăм.

Пĕрер сехетрен ĕçе вĕçлерĕмĕр. Пỹрте кĕтĕмĕр. Сысна пумилккине тумаллах.

 - Чим-ха, - терĕ Сăпани. - Лисук куммана чĕнер-ха.Паян ĕçе каймалла мар. Ерçỹ тупĕ. Пыр-ха, хĕрĕм, хресна аннỹне чĕнсе кил, - хушрĕ çавăнтах Нинука.

- Пĕр саманта та ахаль ирттермест те, килĕ-ши... - иккĕлентĕм эпĕ.

- Ĕнентермелли сăлтав кирлĕ, прибежит как миленькая, - вырăсла-хутăшла «çăрать» кум.

- Ма?!

- Убедительнăй причинăсăр ура ярса пусмасть... Эпир çав «несчастнăй» аншарли пирки хирĕçсе илтĕмĕр ирхине. Ман, как-никак, арăмпа мир тумалла. Крестенька, кил-ха кунтарах, - сĕтел çинчи хут татки çине тем çырса хучĕ, ăна хуçлатрĕ те хĕрĕмĕре тыттарчĕ.

... Ĕçсе-çисе ларнă хушăра алăк яри уçăлчĕ те... кумма кĕрсе тăчĕ. Сулхăн çанталăка пăхмасăр çара пуçăн, кĕпе вĕççĕн хăй. Кăшкăрса йĕрет. Аллинче бинт, йод.

- Ах, чунăм, мĕнле асăрханмарăн-ха. Ăçта-ха уру?! Сăпани, тĕп сакайĕнчен упаленсе тухаканскер, виçĕ литрлă помидор маринадне лап ỹкерчĕ. Чăнкăр-р!..

- Ара, мĕн пулчĕ!

- Нинук хут таткине пачĕ те, чут йăванса каяттăм. «Урана пуртăпа касрăм», - тенĕ, бинт, йод ыйтнă. Ара, сирĕн аптечка тавраш çук-им, кумма?

- Акă вăл, - кап тыттарчĕ ăна мăшăрăм.

Кулкаласа ларакан кум шăл шурри те кăтартмарĕ. Сĕтел хушшинчен чип-чиперех, утсах, тухрĕ.

Çакна курсан, кулас вырăнне, тата вăйлăрах улама пуçларĕ кумма, мăнтарăн:

- Çапла мăшкăлламалла-и ăна? Чĕре тапма чарăнчĕ вĕт.

- Ара, паçăрхине аса илтĕм. Эс ирпе улталарăн, халь ман черет. Серьезнăй причинăсăр килместĕнччĕ кунта, - пăлханăвне пытарма хăтланчĕ кум.

- Каплах шỹтлемелле марччĕ ĕнтĕ, - лăпланаймарĕ мăшăрăм, кĕленче ванчăкĕсене шăлса пуçтарнă май.

«Ахăр саманана» аран ирттерсе, сĕтел хушшине лартрăмăр куммана.

- Пысăк ĕçе Кулăш кунĕнче хускатмалла мар, - пĕтĕмлетрĕ мăшăрăм.

- Шỹтлеме те пĕлмелле, унсăрăн «леш тĕнчене» ăсанма та пулать, - лăпланаймасть Лисук кумма.

- Арăм мана, чăннипех те, юратать иккен, унсăрăн сикким ходом пирвайхи пулăшу пама васкамĕччĕ, - кумман питĕнчен чăпăрт! тутарчĕ кум.

Çак сăмах хыççăн пурте ахăлтатса кулма пуçларăмăр. Тĕрĕссипе, сăмакун çинчен те мансах кайнă эпир. Какайне... Какайне вара çăвар тулли çирĕмĕр. Сысна пумилкки-çке.

Зинаида ЫРПИ.