Пĕтĕмĕшле пĕлỹ паракан вĕренỹ учрежденийĕсенче юлашки шăнкăрав янăрич- чен шутлă кунсем çеç юлчĕç. 9-, 11-классенче пĕлỹ пухакансемшĕн вара питех те яваплă тапхăр - экзаменсем тытасси - пуçланĕ.

Хатĕр-и-ха пирĕн пулас выпускниксем патшалăхăмăрăн пĕтĕмĕшле аттестацийĕ (ППА - ГИА) витĕр тухма?

Шăмăршă муниципалитет округĕнче халĕ 4 вăтам шкул. Педагогсен канашлăвĕсен ларăвĕсен пĕтĕмлетĕвĕ тăрăх, ППА памашкăн 9- (142 çамрăк), 11- (45 çамрăк) классен пур выпускникне те ирĕк панă. Шкултан вĕренсе тухакансем пĕрлехи патшалăх экзаменĕ (ППЭ - ЕГЭ) тата патшалăхăн тĕп экзаменĕ (ПТЭ - ОГЭ) витĕр тухмашкăн заявлени çырнă, ППА ирттермелли тата ун результачĕсене пĕлмелли йĕркесемпе паллашнă.

11-класс выпускникĕсем пăрăнми (обязательные) экзаменсене вырăс чĕлхипе тата математикăпа параççĕ. Профиль математикине - 27 (60 про- цент), база математикине 19, химие - 6, физикăна - 11, историе - 6, обществознание - 21, биологие - 9, информатикăна 4 вĕренекен суйланă.

Тăххăрмĕшсем 4-шар экзамен тытĕç: вырăс чĕлхипе тата математикăпа (пăрăнми экзаменсем) тата иккĕшĕ - хăйсем суйланă предметсемпе. Сывлăх тĕлĕшĕпе хавшакрах (ОВЗ) икĕ выпускникăн пĕлĕвне вырăс чĕлхипе тата математикăпа кăна тĕрĕслĕç.

Экзаменсем Шăмăршă вăтам шкулĕнче иртеççĕ. Кунти экзамен иртекен 4 кабинетра онлайн-видеосăнав йĕркеленĕ. Округри 21 педагога - ППЭ ирттермешкĕн, 44 педагога ПТЭ ирттермешкĕн явăçтармалла. Çавăн пекех экзаменсенче обществăн 6 сăнавçи (экзамен паман çамрăксен ашшĕ-амăшĕ) пулĕç. Сывлăх сыхлавĕн министерствинчен 2 медицина ĕçченĕ юнашарах тăрĕç.

ППЭ ирттерме хутшăнакан педагогсем кăçалхи майăн 4-5- тата 14-мĕшĕсенче ачасемпе пĕрле Пĕтĕм Раççейри хăнăху (тренировка) витĕр тухрĕç.

ППЭне суйлав мелĕпе паракансемшĕн (11-класс) экзаменне Патăрьелĕнче тата Канашра ирттереççĕ. Экзаменсене тĕрĕс-тĕкел ирттермешкĕн электро- энергипе вĕçĕмсĕр тивĕçтерме резервра энергогенераторсем пур.

Патшалăхăн пĕрлехи аттестацийĕ вăхăтĕнче экзаменсене лăпкă лару-тăрура ирттерме, унта хутшăнакансен сывлăхĕпе пурнăçне упрама комплекслă мерăсем йышăннă.

Экзаменсемччен вĕсене тытакансемпе педагогсене, сăнавçăсене куçса çỹремелли схемăсем хатĕр пулĕç; ĕçмелли шывпа, типĕ паекпа тата аптечкăпа тивĕçтермелли ятарлă вырăнсем уйăрăпăр; эвакуацишĕн яваплисене палăртăпăр.

Процедура умĕн экзаменшăн яваплă ертỹçĕ - экзамен йĕркелỹçисене ракета е пилотсăр вĕçекен аппарат (БПЛА) хăрушлăхĕ пулас пулсан - мĕн тумалли пирки инструктаж йĕркелет. Организаторсем вара экзамен тытакансене ку хăрушлăх вăхăтĕнче ăçта каймаллине ăнлантараççĕ.

Выпускниксене илсе çỹрекен автобуссене те ĕçмелли шывпа, типĕ паекпа тата аптечкăпа тивĕçтерме палăртнă.

Шансах тăратпăр: экзаменсем ирттермешкĕн нимле чăрмав та пулмĕ; пурнăç çулĕ çине тухма хатĕрленекен çамрăксем патшалăхăн пĕтĕмĕшле аттестацийĕ витĕр ăнăçлă тухĕç, çирĕп пĕлỹ кăтартĕç, малалла вĕренмешкĕн кирлĕ чухлĕ балсем пухĕç. Çапла пултăр...

Н.ЕНДИЕРОВ,

округ администрацийĕн вĕренỹпе çамрăксен пайĕн начальникĕ.