«Хаçатсăр - пурăнма май çук»
Çапла калаççĕ «Шăмăршă хыпарĕ» хаçат пирки Анат Чаткасри пĕр тăван Николай Воробьевпа Людмила Угасина. Вĕсем - район хаçачĕн яланхи тусĕсем. Иккĕшĕ те - тăван «Восход» хуçалăхра ырми-канми вăй хунă, ял хуçалăх аталанăвне сумлă тỹпе хывнă. Николай Андреевич çĕр пулăхлăхне лайăхлатас тата вăйлă тыр-пул туса илес тĕлĕшпе тăрăшнă, «ЧР тава тивĕçлĕ агрономĕ» хисеплĕ ята тивĕçнĕ. Людмила Андреевна уй-хирте, йĕтем çинче тар тăкнă.
- Пирĕншĕн хаçатри кашни тема хаклă, çапах та ял хуçалăх отраслĕ пирки пичетленекен статья-очерк чуна çывăхрах. Çур акипе тыр çи, çавăн пекех çĕр ĕçченĕсемпе выльăх-чĕрлĕх ĕрчетекенсем, ĕç маякĕсем пирки хайланă материалсем питĕ килĕшеççĕ. Фермерсен çитĕнĕвĕшĕн чунтан савăнатпăр: вĕсем - ял тĕрекĕ-çке. Çĕр çинче культурăсемпе пахча çимĕç туса илмелли вăрттăнлăхсем пирки пĕлме те кăсăклă, - теççĕ тетĕшĕпе йăмăкĕ.
Округ çыннисене кăçалхи 2-мĕш çур çулта илсе тăмашкăн «Шăмăршă хыпарне» çырăнма кăмăлтан сĕнеççĕ пĕр тăвансем.
З.Воробьева.