Акатуй
Уй-хирте ака вĕçленнĕ,
Ешерет хитрен калча.
Çĕр çынни ĕçре ĕшеннĕ -
Халь илер пăртак канса.
Акатуй паян, тăванăм,
Ипподром кĕтет пире.
Уява васкарĕ ялăм,
Савнăçпа тапать чĕре.
Ах, камсем-ши хыт юрлаççĕ?
Курăр, пĕлĕр - чукалсем!
Чаткассем те пит юлмаççĕ,
Юнашар - карапайсем.
Кĕрешеççĕ, вăй виçеççĕ,
Кам-ха юлĕ паттăра?
Хаклă парнесем кĕтеççĕ,
Чи чапли - така вара!
Лашасем те ăмăртаççĕ,
Ыткăнать шурри, хури...
Кăшкăраççĕ, ал çупаççĕ:
Кам-ши, кам чи маттурри?
...Туссемпе пĕрле ларатпăр,
Тутлă чей сăмаварта.
Пĕр-пĕрне телей сунатпăр,
Лайăх-çке Акатуйра!
Ив.САЛАНТАЙ.